साउन २६, सिन्धुली/सिन्धुली खबर डटकमका प्रधानसम्पादक नविन श्रेष्ठ नेपाल आदिवासी जनजाति पत्रकार महासंघ (फोनिज) बागमती प्रदेश समितिबाट सम्मानित हुनुभएको छ । फोनिजको २५औं स्थापना दिवसको अवसरमा सिन्धुलीमा शनिबार आयोजित समारोहमा श्रेष्ठलाई ५ हजार ५०० रुपैयाँसहित सम्मान गरिएको हो ।

फोनिज बागमती प्रदेश समितिले लामो समयदेखि सिन्धुलीमा रहेर पत्रकारितामा क्रियाशील श्रेष्ठले प्रदेशमा फोनिजको अभियान सशक्त बनाउन खेल्नुभएको भूमिकाको उच्च कदर गर्दै सम्मान गरिएको जानकारी दिएको छ । कार्यक्रमका प्रमुख अतिथि बागमती प्रदेश सरकारकी उद्योग, वाणिज्य, भूमि तथा प्रशासनमन्त्री सुकमाया तामाङले सम्मानपत्र र नगद पुरस्कार प्रदान गर्नुभयाे । उहाँले सम्मानित प्रधान सम्पादक श्रेष्ठलाई बधाई ज्ञापन गर्दै आगामी दिनमा अझ सक्रिय रुपमा अगाडि बढ्न शुभकामना दिनुभयो ।

फोनिज बागमती प्रदेश समितिको प्रकाशन विभाग प्रमुख समेत रहनुभएका प्रधान सम्पादक श्रेष्ठ लामो समयदेखि पत्रकारितासँगै फोनिजको अभियानमा सक्रिय हुनुहुन्छ । उहाँले फोनिज सिन्धुली जिल्ला कार्यसमितिमा दुई कार्यकाल अध्यक्षको जिम्मेवारीमा काम गरिसक्नुभएको छ । २०६२ सालमा फोनिजसँग जोडिनुभएका उहाँ २०६४ मा सिन्धुली जिल्ला कार्यसमिति सदस्य, २०६७ मा उपाध्यक्ष र २०७४ देखि २०७८ सम्म अध्यक्ष रहनुभएको थियो ।

जिल्लादेखि प्रदेशसम्म फोनिजको संगठन विस्तार र संस्थागत कार्यक्रमहरु सफल बनाउन उहाँले योगदान गर्दै आउनुभएको छ । सोही योगदानको मूल्यांकन गर्दै २५औं स्थापना दिवसको अवसरमा सम्मान गरिएको हो ।