मंशिर ४, सिन्धुली/सिन्धुलीको मरिण गाउँपालिकाको ७ वटै वडामा वडा स्तरिय खेलकुद प्रतियोगिता गरिने भएको छ । गाउँपालिकाको अध्यक्ष कप फुटबल प्रतियोगिताको लागि वडास्तरीय छनोट प्रक्रिया सुरु गरिएको हो ।

आज मरिण गाउँपालिका २ नम्बर वडाको मुङ्ग्रे दोभानमा युवा तथा खेलकुद विकास समितिका कार्यबाहक अध्यक्ष बृष मोक्तान (अजय)को अध्यक्ष तथा गाउँपालिकाका अध्यक्ष बिमर्श मोक्तान (प्रख्यात) को प्रमुख आतिथ्यतामा वडा स्तरिय फुटबल प्रतियोगिताको उद्घाटन गरिएको छ ।

अध्यक्ष कप फुटबल प्रतियोगिताको लागि वडा स्तरिय प्रतियोगिताको आयोजना गरिएको गाउँपालिकाका अध्यक्ष मोक्तानले बताउनु भयो । वडाबाट उत्कृष्ठ खेलाडि मात्रै पालिका स्तरिय प्रतियोगितामा लैजानको निम्ति छनोट सुरु गरिएको उहाँले बताउनु भयो ।

समग्र खेलकुदको विकास, सम्बर्धन, प्रबर्धन र खेलकुद प्रतिको आकर्षण अभिवृद्धि गर्न महत्त्वपूर्ण योगदान पु¥याउने उद्देश्यले खेलकुद प्रतियोगिता आवश्यक रहेको गाउँपालिकाका अध्यक्ष मोक्तानको भनाई छ । यस्ता प्रतियोगिताले खेलाडि उत्पादनमा महत्वपुर्ण भूमिका खेल्ने पनि उहाँले बताउनु बताउनु भयो ।

यो बर्ष गाउँपालिकाले चौँथो अध्यक्ष कप फुटबल प्रतियोगिता आयोजन गर्ने तयारी गरिरहेको गाउँपालिकाका प्रमुख प्रशासकिय अधिकृत ओम दर्जिले बताउनु भयो । वडास्तरीय खेलाडि छनोटको लागि गाउँपालिकाले ७ वटै वडालाई २/२ लाख बजेट बिनियोजन गरेको छ । उद्घाटन कार्यक्रममा २ नम्बर वडाका वडा अध्यक्ष बहादुर आले मगर लगायत वडा सदस्यहरुको उपस्थिती रहेको थियो । यसभन्दा अगाडि वडा नम्बर ४ ले वडास्तरीय फुटबल प्रतियोगिता सम्पन्न गरिसकेको छ ।