असोज ११, सिन्धुली सिन्धुलीमाढीमा आज खुल्ला ब्याडमिन्टन प्रतियोगिताको उद्घाटन गरिएको छ । नजिकिदै गरेको विजयादशमी, दिपावली तथा छैठपर्वको अवसरमा भेटेरिनरी ब्याडमिन्टन समुहद्धारा आयोजित खुल्ला ब्याडमिन्टन प्रतियोगिताको बागमती प्रदेशका सांसद छेत्र बहादुर बम्जनले उद्घाटन गर्नुभएको हो ।

नेपालीहरुको माहान पर्व नजिकीदै गर्दा मनोरन्जन, शारिरिक तन्दुरुस्त साथै शुभकामना आदान प्रदानको लागि खुल्ला ब्याडमिन्टन प्रतियोगिताको आयोजना गरिएको भेटेरिनरी ब्याडमिन्टन समुहका अध्यक्ष शम्भु बहादुर श्रेष्ठले बताउनु भयो । ३ दिन सम्म चल्ने प्रतियोगिताको बागमती प्रदेश सांसद छेत्र बहादुर बम्जन र सिन्धुलीका प्रमुख जिल्ला अधिकारी सुनिता नेपालले ब्याडमिन्टन खेलेर उद्घाटन गरिएको समुहका उपाध्यक्ष बिमल श्रेष्ठले जानकारी दिनुभयो ।

प्रतियोगितामा ३२ जोडि सहभागिता जनाएका छन् । प्रथम जोडिलाई २ वटा कालिज गोल्ड मेडल र ट्रफि, दोस्रो जोडिलाई २ वटा लोकल भाले, गोल्ड मेडल र ट्रफि र तेस्रो जोडिलाई लोकल हाँस, गोल्ड मेडल र ट्रफि पुरस्कार प्रदान गरिने आयोजकले जनाएको छ । आज ५ वटा प्रतियोगिता समापन भएको छ । उद्घाटन कार्यक्रममा कमलामाई नगरपालिका वडा नम्बर ६ का वडा अध्यक्ष उज्वल थापा, जिल्ला ब्याडमिन्टन संघ सिन्धुलीका अध्यक्ष दिपेन्द्र बुढाथोकी लगायतको उपस्थिती रहेको थियो ।