सिन्धुली/‘स्वास्थ्यको लागि खेलकुद राष्ट्रका लागि खेलकुद’ भन्ने मूल नाराका साथ सुरु भएको १३ औं राष्ट्रपति रनिङ शिल्ड तथा प्रथम सिन्धुली महोत्सव मंगलबार सकिएको छ ।

जिल्ला खेलकुद विकास समिति सिन्धुलीका अध्यक्ष बीर बहादुर थिङ तामाङ (विशाल) को अध्यक्षता तथा प्रतिनिधि सभा सदस्य लेखनाथ दाहाल (राजन) को प्रमुख आतिथ्यतामा बृहत कार्यक्रम गर्दै महोत्सवको समापन गरिएको हो ।

फाल्गुण ५ गतेबाट सुरु भएको प्रथम खेलकुद महोत्सवमा ३० स्वर्ण, १२ रजत र ४ कास्य सहित कमलामाई नगरपालिका प्रथम भएको छ । त्यस्तै ६ स्वर्ण, ९ रजत र ३ कास्य सहित तीनपाटन गाउँपालिकाले दोस्रो स्थान प्राप्त गरेको छ भने ६ स्वर्ण, ३ रजत र ९ कास्य सहित हरिहरपुरगढी गाउँपालिका तेस्रो भएको छ । महोत्सवमा खेलाडिहरुलाइ सक्रिय सहभागिता गराउँन सहयोग गर्ने सवै पालिकाहरुलाई आयोजकले धन्यवाद दिएको छ ।

खेलकुद महोत्सव समापन कार्यक्रममा बोल्दै प्रमुख अतिथि तथा प्रतिनीधि सभा सदस्य लेखनाथ दाहालले सबैको पहल र सहयोगमा राष्ट्रपति रनिङ शिल्ड प्रतियोगिता एवं प्रथम खेलकुद महोत्सव सफल भएको बताउनुभयो । जिल्लामा पहिलोपटक खेलकुद महोत्सवको आयोजना गर्न हिम्मत गर्ने खेलकुद विकास समिति परिवारलाई धन्यवाद दिँदै दाहालले महोत्सव सफल पार्न जिल्लाका सवै स्थानीय तहको अहम् भूमिका रहेको धारणा व्यक्त गर्नुभयो ।

साथै वहाँले जिल्लामा उच्च लयमा रहेका खेलाडिहरुले प्रदेश र राष्ट्रियस्तरमा समेत आफूलाई अव्वल सावित गर्नेगरि तयारी गर्न सुझाव दिुनभएको छ । आफू र आफूले नेतृत्व गरेको स्थानबाट खेल र खेलाडिहरुको पक्षमा काम गर्न आफू सँधै तयार रहेको दाहालको भनाई छ ।

प्रथम जिल्ला खेलकुद महोत्सव २०८१ को समापन कार्यक्रमकै अवसरमा जिल्लामा कार्यरत तीनजना पत्रकारहरुलाई सम्मान समेत गरिएको छ । सिन्धुली खवर डटकमका गंगा विशुंखे, पालिका आवाजका आस्था विक र रेडियो विजयकिल्लाका कविराज तामाङ्लाई सम्मान गरिएको हो ।

खेलकुद महोत्सव तथा राष्ट्रपति रनिङ शिल्डको अवधिभर सक्रिय रुपमा समाचार संकलनमा गरेको योगदानको कदर गर्दै सम्मान गरिएको आयोजकले जनाएको छ । उनिहरुलाई कार्यक्रमका प्रमुख अतिथि लेखनाथ दाहालले खादा र प्रमाण पत्र सहित सम्मान गर्नुभएको छ ।