भदौ ३०, सिन्धुली/सिन्धुली मरिण गाउँपालिका वडा नम्बर ४ साहानमा सरसफाई गरिएको छ । शनिबार (आज) साहान चोक स्थित मन्दिर र प्रतिक्षालय परिसरमा सरसफाई गरिएको हो ।

मरिण गाउँपालिकाका अध्यक्ष बिमर्श मोक्तान(प्रख्यात)को नेतृत्वमा झाडी सरसफाई गरिएको थियो । मरिणलाई सुन्दर हराभरा बनाउने लक्ष्य भएपनि चोक, मन्दिर, प्रतिक्षालय तथा सार्बजनिक स्थान र सडकहरुमा फोहोर थुप्रिएको र झाडिहरु बढेकाले आफै सरसफाईमा लागेको अध्यक्ष मोक्तानले बताउनु भयो ।

घर, आँगन, सडक लगायत सार्बजनिक स्थल सफा नराख्दा लामखुट्टेले बाँसस्थान बनाउँने र डेङ्गोको संक्रमण बढ्ने त्यस्तै समाजमा नकारात्मक सन्देश जाने बताउनुहुँदै मोक्तानले आफ्नो टोल सफा र सुृन्दर राख्न स्तानीयलाई आग्रह गर्नुभयो ।

बिहानै आएर अध्यक्ष मोक्तान झाडि तान्दै गरेको देखेपछि स्थानीयहरु पनि हसिँया, खुर्पा बोकेर सरसफाईमा सामेल भए । घर, पसलबाट निस्केको फोहोरले सडक, सार्बजनिक स्थान दुर्गन्धित हुने देखिएपछि डस्विनको आवश्यकता महसुस भएको स्थानीय सुमित्रा बलले बताउनु भयो ।

आफ्नो ठाउँ आफै सुन्दर बनाउने भन्दै प्रत्येक शनिबार साहानका सार्बजनिक स्थलमा सरसफाई गरिने स्थानियले निर्णय गरेका छन् ।