भदौ २९, सिन्धुली/माध्यमिक तहको जिल्ला स्तरीय खुल्ला कविता प्रतियोगितामा क.न.पा. ४ मिलनचोक स्थित सिन्धुली एकेडेमीको कक्षा १० मा अध्ययनरत छात्रा प्राश्ना अधिकारी प्रथम भएकी छिन् ।

रेडियो शिद्धबाबाको आयोजना तथा कमलामाइ नगरपालिकाको सहकार्यमा आयोजना गरेको खुल्ला प्रतियोगितामा अधिकारी प्रथम भएकी हुन् । कमलामाई नगरपालिकाको सभाहलमा भएको कविता प्रतियोगितामा २७ जना सहभागी मध्ये अधिकारी उत्कृष्ट भएकी हुन् ।

विद्यालयले बेलाबेला आयोजना गर्ने यस्ता प्रतियोगितामा भाग लिने र कहिलेकाहीँ खाली समयमा आफुले कविता गजल लेख्ने गरेको अधिकारी बताउँछिन् । आज भएको जिल्ला स्तरीय कार्यक्रममा प्रथम हुँदा धेरै नै खुशी भएको उनी भन्छिन् । आफ्नो विद्यालय साथै घर परिवारका सदस्यबाट यस्ता अतिरिक्त क्रीयाकलापमा खुलेर सहयोग पाउने भएकाले आफुले यो स्थान हाँसिल गर्न सकेको उनी बताउँछिन् ।

“विद्यालयमा यस्ता कार्यक्रमहरु हरेक शुक्रबार हुने गर्थे । यस पटक नगरपालिकामा कविता वाचन प्रतियोगिता छ, विद्यालयको प्रतिनिधित्व गरेर तिमी जानू पर्छ है भनेर सर म्यामले केही दिन अघि भन्नू भयो, अनि घर गएर बेलुका एउटा कविता तयार पारेँ । आज आएर कार्यक्रममा त्यही कविता वाचन गरेँ, प्रथम भएँ, निकै नै खुशी लाग्यो,” उनी भन्छिन् ।

प्राश्ना प्रथम भएको कुराले आफुहरु पनि धेरै खुसी भएको विद्यालयका प्रीन्सिपल प्रशान्त ढकाल बताउँछन् । विद्यार्थीलाई पढाईको साथसाथै अरु अतिरिक्त क्रीयाकलापमा पनि अब्बल बनाउने आफ्नो योजना रहेको उनी बताउँछन् ।