भदौ २३,सिन्धुली/सिन्धुलीमा स्कुल बसले ठक्कर दिदा एक पैदल यात्रीको मृत्यु भएको छ । अरुणठाकुर सडकखण्ड अन्र्तगत दुधौली नगरपालिका वडा नम्बर १० स्थित रातमाटामा स्कुलबसले अटोलाई ठक्कर दिई बस अनियन्त्रीत भई पैदल यात्रीलाई ठक्कर दिदा पैदल यात्रीको घटना स्थलमै मृत्यु भएको हो ।
मृत्यु हुनेमा दुधौली नगरपालिका वडा नम्बर १३ का ५२ बर्षीय समर बहादुर तामाङ रहको जिल्ला प्रहरी कार्यालय सिन्धुलीका प्रहरी निरिक्षक केशब कटुवालले जानकारी दिनुभयो ।
जल्किनेबाट दुधौली तर्फ आउँदै गरेको प्रदेश १—०५—००१ ह ०१८३ नम्बरको अटोलाई सोहि दिसाबाट आउँदै गरेको बा ४ ख ५१३० नम्बरको कमलामाई बोर्डिङ स्कुलको बसले ठक्कर दिएपछि बस अनियन्त्रीत भई पैदल यात्रीलाई ठक्कर दिएको थियो ।
बसले अटोलाई ठक्कर दिदा अटो चालक दुधौली नगरपालिका १३ का ५० बर्षीय सोनिलाल तामाङ र अटोमा सवार सोहि स्थानकी ३५ बर्षीय संगिता मोक्तान सामान्य घाइते भएको प्रहरीले जनाएको छ ।
बसले ठक्कर दिई मृत्यु भएका पैदल यात्रीका आफन्तले बिरोध प्रदर्शन गरी मदन भण्डारी राजमार्ग बन्द गरेका थिए । मृतकको परिवारलाई स्कुलले क्षतीपुर्ति दिने सहमती भएपछि सडक खुलेको छ।