भदौ १९ सिन्धुली/सिन्धुलीको दुधौली नगरपालिका वडा नम्बर ३ मा भुसिया कुकुरले टोकेर ७ जना घाइते भएका छन् । दुधौलीको झुँगाबाट सेतो प्रकारको कुकुरले बाटो हिँडिरहेका मानिसलाई टोक्न सुरु गरेको थियो ।
भुसिया कुकुरले ३ नम्बरको झँगाको २ जना, खुट्टेपानीको २ जना, निपानेको २ जना र कालापानीको २ जना लाई टोकेको दुधौली नगरपालिका वडा नम्बर ३ का वडा अध्यक्ष भद्रा माभिले जानकारी दिनुभयो ।
घाइतेहरु ६५ बर्षीय भिम बहादुर खत्री,२० बर्षीय मिलन धामी,६० बर्षीय किशनलाल धामी,२० बर्षीय संगीता कुँमर, ७३ बर्षीय दिलमाया बुढाथोकी र ५ बर्षीय बालक जेम्स मिजारलाई प्राथमिक स्वास्थ्य केन्द्र सिर्थौलीमा प्राथमिक उपचार पश्चात काठमान्डौँ पठाइएको छ ।
कुकुरले स्थानीयको घरपालुवा जनावरलाई समेत टोकेको अध्यक्ष माझिले जानकारी दिनुभयो । घाइतेहरुको अनुहार,हात,खुट्टामा चोट लागेको छ । भुसिया कुकुर नियन्त्रणको लागि डिभिजन वन कार्यालय सिन्धुली र स्थानीयले खोजिरहेका छन् ।