असार ३१,सिन्धुली/सिन्धुली जिल्ला पूर्ण खोप सुनिश्चित जिल्ला घोषणा भएको छ । बागमती प्रदेशका मुख्यमन्त्री सहित मन्त्रीत्रयको उपस्थितीमा आज एक कार्यक्रमका बिच सिन्धुली जिल्लालाई पूर्ण खोप सुनिश्चित जिल्ला घोषणा गरिएको हो ।
जिल्ला समन्वय समिती सिन्धुलीका संयोजक कार्साङ लामाको अध्यक्षता तथा बागमती प्रदेशका मुख्यमन्त्री शालिकराम जमकट्टेलको प्रमुख आतिथ्यता साथै बामगती प्रदेशका आन्तरिक मामिला तथा कानुनमन्त्री गंगा नारायण श्रेष्ठ र स्वास्थ्य मन्त्री उत्तम जोसीको उपस्थितीमा सिन्धुली जिल्लालाई पुर्ण खोप सुनिश्चितता तथा दिगोपना घोषण गरिएको हो ।
राष्ट्रिय खोप तालिकामा समावेश भएका सबै खोप सबै बालबालिकाले लगाएकोलाई पूर्ण खोप सुनिश्चित भएको मान्ने गरिन्छ । हालसम्म राष्ट्रिय खोप तालिकामा १३ वटा खोप समावेश गरिएको छ ।
तोकिएको मापदण्ड अनुसार सिन्धुली जिल्लाभरका १६ महिना देखि ५९ महिना सम्मका कुल १४ हजार ३ सय ९२ जना बालबालिका रहेको छन् । ती सम्पुर्ण बालबालिकाहरुलाई राष्ट्रिय खोप तालिकाको मापदण्ड अनुसार खोप दिइसकेको र जिल्लाका नौ वटै पालिकाले पूर्ण खोप पालिका घोषणा गरिसकेपछि मुख्यमन्त्री शालिकराम जमकट्टेलले सिन्धुली जिल्लालाई पुर्ण खोप सुनिश्चितता तथा दिगोपना जिल्ला घोषण गर्नुभएको हो ।
पुर्ण खोप सुनिश्चितता तथा दिगोपना घोषण गर्नको निम्ति जिल्ला समन्वय समिती सिन्धुलीका संयोजक कार्साङ लामा,सिन्धुलीका प्रमुख जिल्ला अधिकारी सुनिता नेपाल र स्वास्थ्य कार्यालय सिन्धुलीका प्रमुख राजन पाख्रेलले मुख्यमन्त्री शालिकराम जमकट्टेल समक्ष समर्थन सहित पेश गर्नुभएको थियो ।