असार ७, सिन्धुली/सिन्धुलीमा ६१ जना एचआईभी संक्रमित रहेका छन् । सिन्धुली प्लसको तथ्याङ्क अनुसार जिल्लाको सरकारी अस्पताल सिन्धुली अस्पतालको एआरटीबाट ६१ जना एचआईभी संक्रमितले निशुल्क औषधि सेवन गरिरहेको जनाएको छ ।

जस अनुसार कमलामाई नगरपालिकामा सबैभन्दा धेरै ३५ जना संक्रमित रहेका छन् । ८ बर्ष उमेर समुह देखि ६० बर्ष उमेर समुहका मानिस एचआइभी संक्रमित रहेको सिन्धुली प्लसकी मिना मगरले जानकारी दिनुभयो । त्यस्तै दुधौली नगरपालिकामा १५ जना, तीनपाटन गाउँपालिकामा ९ जना, मरिण गाउँपालिकामा ७ जना , गोलन्जोर गाउँपालिकामा ५ जना, फिक्कल गाउँपालिकामा ५ जना,हरिहरपुरगढी गाउँपालिकामा ३ जना र घ्याङलेख र सुनकोशी गाउँपालिकामा २/२ जना रहेको तथ्याङ्कमा उल्लेख छ ।

पहिलेको तुलनामा एचआइभी/एड्स संक्रमित बढ्दै गइरहेको सिन्धुली प्लसकी मिना मगरले बताउनु भयो । “पहिलेको तुलनामा पछिल्लो समय संक्रमित बढिरहेको देखिन्छ । हुन त पहिले संक्रमित भएर पनि खुल्दैनन् थिए । अहिले संक्रमितहरु खुल्न थालेर पनि संख्या बढेको हुन सक्छ । ; उहाँले भन्नुभयो । नियमित रुपमा औषधी सेवन गर्ने मात्रै ६१ जना छन् । अझै नखुल्ने अरु जिल्लाबाट औषधि सेवन गर्ने पनि रहेको उहाँले बताउनुभयो ।

“जिल्लाकै संक्रमितहरु पनि अन्य जिल्लाबाट औषधि सेवन गरिरहेका पनि छन् । त्यो हेर्दा जिल्लामा संक्रमितको संख्या अझै बढी छन् ; मगरले थप्नुभयो । सिन्धुली प्लस गैरसरकारी संस्था हो । २०७३ सालबाट एचआईभी एड्स महासंघ नेपालबाट फण्डिङ भएर एचआईभी/एड्स सँग सम्बन्धीत काम गदैँ आइरहेको छ ।

जिल्लामा सुईद्वारा लागूपदार्थ सेवन गर्नेहरू, यौनकर्मी, पुरुष समलिंगी तथा तेस्रो लिंगीहरू, वैदेशिक रोजगारीमा गएकाहरूबाट संक्रमित बढिरहेका छन् । सिन्धुली प्लसले एचआइभी रोकथामको लागि जनचेतनामुलक कार्यक्रम तथा संक्रमितहरुलाई सुरक्षित व्यवस्थापन गर्नको लागि काम गरिरहेको छ ।