जेठ १७, सिन्धुली/जिल्लाको तिनपाटन गाउँपालिका-२ स्थित भिमस्थान चोकमा सवारी दुर्घटना हुँदा एक जना गम्भीर घाइते भएका छन् । आज बिहान करिब सवा ११ बजे ट्याक्टरले मोटरसाइकललाई ठक्कर दिँदा मोटरसाइकल चालक नवराज काफ्ले गम्भीर घाइते भएका हुन् ।

उनलाई उपचारका लागि जिल्ला अस्पताल सिन्धुली ल्याइएकोमा थप उपचारका लागि हेलिकप्टरमार्फत ललितपुरको नेपाल मेडिसिटी अस्पतालमा लगिएको जिल्ला प्रहरी कार्यालय सिन्धुलीले जानकारी दिएको छ । घाइते ४५ वर्षीय काफ्ले तिनपाटन गाउँपालिका-१ चिसापानीका हुन् ।

प्रहरीका अनुसार भिमस्थानबाट बेलघारीतर्फ आउँदै गरेको प्रदेश २-०३-००१ त ५५२६ नम्बरको ट्याक्टरले विपरीत दिशातर्फ गइरहेको प्रदेश-२-०२-००५ प ४७४३ नम्बरको मोटरसाइकललाई ठक्कर दिँदा उक्त दुर्घटना भएको हो । ट्याक्टर र चालकलाई नियन्त्रणमा लिई अनुसन्धान गरिरहेको प्रहरीले जनाएको छ ।