कार्तिक ३०, सिन्धुली/सिन्धुली कारागारमा एकजना थुनुवाको मृत्यु भएको छ । जिल्ला कारागार सिन्धुलीका थुनुवा दुधौली नगरपालिका वडा नम्बर १० का ३० बर्षीय बिमल मगरको मृत्यु भएको हो ।

गएराति साँढे तिन बजेको समयमा कारागारमा सुतिरहेको समयमा थुनुवा मगर एक्कासी चिच्याएपछि अन्य कैदीहरु जाँदा बेहोस अवस्थामा देखेपछि जिल्ला कारागार सिन्धुलीका प्रहरीले उनलाई सिन्धुली अस्पताल ल्याएका थिए । तर मगरकाे बाटैमा मृत्यु भइसकेको पाइएको जिल्ला प्रहरी कार्यालय सिन्धुलीका प्रवक्ता चिरन्जीवी दाहालले जानकारी दिनुभयो ।

मृतकको शव सिन्धुली अस्पतालमै राखिएको छ । यता मृतकका आफन्तले भने प्रहरीको लापारर्बाहीका कारण मृत्यु भएको भन्दै मदन भण्डारी राजमार्ग ठप्प गराएका छन् ।