भदौ २७, सिन्धुली/सिन्धुलीमा जुनारमा फल चुस्ने सेतो पुतलीको प्रकोप फैलिन सुरु भएको छ । सिन्धुलीको गोलन्जोर गाउँपालिकामा जुनारका बगैँचामा फल चुस्ने सेतो पुतली फैलन सुरु भएपछि व्यवस्थापनको लागि विज्ञ र किसानहरु बिच १ दिने अन्तरक्रया गोष्ठी सन्चालन गरिएको हो ।

जुनार सुपरजोन सिन्धुलीका प्रमुख रमेश हुमागाईको अध्यक्षता तथा गोलन्जोर गाउँपालिकाका उपाध्यक्ष ज्वाला प्रसाद न्यौपाने (पुकार) को प्रमुख आतिथ्यतामा भएको अन्तरक्रियामा किसानलाई जुनारमा लागेको किराको प्रकोप नियन्त्रण तथा रोकथामको उपायको बिषयमा प्रशिक्षण गराईको थियो ।

जुनार सुपरजोनले किसानले जुनारको बगैँचामा किराको प्रकोप देखिन लागेको गुनासो गरेकाले १ सातादेखि नियन्त्रणमा जुटेको सुपरजोनका प्रमुख रमेश हुमागाईले बताउनु भयो । नेपाल कृषि अनुसन्धान परिषदका किराका वैज्ञानिक कासिराम सिलवाल,बालिरोग बिशेषज्ञ डाक्टर बिमला पन्त र किरा विज्ञ देवाराज अधिकारीले बगैँचाको अनुगमन पश्चात व्यवस्थापनको लागि गोष्ठिको आयोजना गरिएको प्रमुख हुमागाईले जानकारी दिनुभयो ।

जुनारमा देखिएको सेतो किरा रातिको समय ७ बजे देखि ११ बजेको समयमा जुनारमा बस्ने भएकाले नियन्त्रणको लागि चुनौति रहेको किराका वैज्ञानिक कासिराम सिलवालले बताउनु भयो । ठुलो झुण्डमा फैलिने भएकाले बिषादीले नियनत्रणमा नआउने भएकाले किसानलाई रातिको समयमा बगैँचामा उज्यालो बनाउने, पुतली लाई समातेर मारेर नियन्त्रणमा लिन आग्रह गर्नुभयो ।

गोलन्जोर गाउँपालिकाका उपाध्यक्ष ज्वाला प्रसाद न्यौपानेले जुनारमा लागेको किरा नियन्त्रणको लागि सहयोग गरिने बताउनु भयो । गोलन्जोर गाउँपालिकाको वडा नम्बर ५, वडा नम्बर २, वडा नम्बर ९ का बगैचामा सेतो किराको प्रकोप देखिएको छ ।