साउन २३,सिन्धुली/जिल्लाको सुनकोशी गाउँपालिका –५ रामटारमा बुधबारे हाटबजार संचालनमा आएको छ । हाटबजारको आज एक औपचारिक कार्यक्रमका बिच सुनकोशी गाउँपालिकाका अध्यक्ष दिपा बोहोराले उद्धघाटन गर्नुभएको हो ।

स्थानीयस्तरमा उत्पादन रैथाने, ताजा र अर्गानिक बस्तुहरु किनबेच गर्ने उदेश्यले प्रत्येक साताको बुधबार हाटबजार संचालनमा ल्याइएको अध्यक्ष बोहोराले बताउनुभयो । हाटबजार व्यवस्थीत नहुँदा कृषकले हैरानी बेहोर्नु परेको गुनासोको सम्बोधन गदैँ हाटबजार सन्चालनमा ल्याइएको अध्यक्ष बोहोराले भन्नुभयो ।

खुद्रा तथा अर्गानिक बस्तुको स्थानीय स्तरमै किनबेच गरेर कृषक ,व्यापारी ताथ उद्यमीलाई प्रोत्साहन गर्ने उपाध्यक्ष कपिल कुमार कोइरालाको भनाई छ । सुनकोशी गाउँपालिका र लि बर्ड संस्थाको आर्थिक तथा प्राविधिक सहयोगमा ३९ वटा स्टलहरु निर्माण गरि हाट बजार संचालनमा ल्याइएको छ ।

बुधबार (आज) हाट बजार संचालनको पहिलो दिन तरकारी, फलफूल, लोकल कुखुरा,कपडा,खाजानास्ता, लगायतका २९ वटा स्टल बाट ब्यापार भएको छ । स्थानीय साना किसानहरुलाई प्रोत्साहन गर्दै स्थानीय रैथाने, अर्गानिक बालीहरुलाई जनस्तर सम्म पुर्याउने र प्रोत्साहन गर्ने, स्यानीय उत्पादन लाई बजार संग जोडेर अर्थतन्त्र लाई मजबुद बनाउने उदेश्यले हाट बजार संचालनमा ल्याइएको सुनकोशी गाउँपालिकाका प्रमुख प्रशासकिय अधिकृत अर्जुन दर्जिले जानकारी दिनुभयो ।

स्थानीय स्तरमा हाट बजार संचालन पश्चात किसानको आर्थिक अवस्थामा सुधार गर्ने अपेक्षा गरिएको छ । आफुले उत्पादन गरेका विभिन्न सामग्री आफ्नै ठाउँमा विक्रि गर्न पाउँदा स्थानीय हर्षित भएका छन् ।