मरिणका किसानलाई पाडा वितरण

सिन्धुली/यहाँको मरिण गाउँपालिकाले स्थानीय कृषकलाई प्रोत्साहित गर्ने उद्देश्यले भैँसीको पाडा वितरण गरेको छ । मंगलबार एक औपचारिक कार्यक्रम गरेर पालिकाले किसानलाई भैँसीको पाडा वितरण गरेको हो ।
गाउँपालिकाको आर्थिक वर्ष २०८१/८२ को स्वीकृत ‘मासुका लागि पाडा प्रवद्र्धन कार्यक्रम’ अन्तर्गत पालिका अध्यक्ष विमर्श मुक्तान (प्रख्यात) ले किसानहरुलाई पाडा हस्तान्तरण गर्नुभएको हो । मरिण गाउँपालिका वडा नम्बर ४ का १० घर परिवारलाई दुई/दुई वटाको दरले पाडा वितरण गरिएको बताइएको छ । नेपाल र चीन बिच भएको सम्झौता बमोजिम नेपालको भैँसीको मासु चीन पठाइने छ । यसका लागि मरिणकै वडा नं. ४ साहानमा पनि चाइनिज कम्पनिले मासु कटिङ उद्योग स्थापना गर्न प्रकृया सुरु गरिसकेको पालिकाले जनाएको छ ।
पाडा वितरण कार्यक्रममा बोल्दै अध्यक्ष विमर्श मुक्तानले पालिकाको पहिलो प्राथकिमता भनेको स्थानीय किसान र उनिहरुको संरक्षण, प्रोत्साहन तथा प्रवर्द्धन भएको बताउनुभयो । किसानहरु जव आत्मनिर्भर हुन्छन् तवमात्र स्थानीय सरकार सफल हुने धारणा राख्दै अध्यक्ष मुक्तानले मासु कटिङ उद्योग स्थापना भएपश्चात राँगा भैसीपालन गर्ने किसानहरुलाई आयआर्जनको श्रोतमा थप मद्दत पुग्ने बताउनुभयो ।