जेठ २९,सिन्धुली/कमला खोलाले बगाएर सिन्धुलीमा एक जनाको मृत्यु भएको छ । सिन्धुलीको कमलामाई नगरपालिका १३ माथिल्लो रानिबासका ६८ बर्षीय पुर्ण प्रसाद दाहालको आज (सोमबार) कमला खोलाले बगाएर मृत्यु भएको हो ।
बिहान ८ः३० बजे माथिल्लो रानिबासबाट छिमेकी कर्ण बहादुर कार्की र मृतक दाहाल गोरु किनेर मडाहाबाट फर्कदा खोला तर्ने क्रममा दाहाललाई कमला खोलाले बगाएको जिल्ला प्रहरी कार्यालय सिन्धुलीका प्रहरी प्रमुख राजकुमार सिलवालले जानकारी दिनुभयो ।
कमलामाई नगरपालिका १४ खिरखिरे चन्दनपुरबाट दाहाललाई बगाएपछि छिमेकी कार्कीले तत्काल प्रहरी र स्थानीयलाई खबर गरेका थिए । दाहाललाई बगाएको स्थानबाट करिब २ कि.मी तलबाट मृत अबस्थामा फेला पारी परिवारको जिम्मा लगाएको प्रहरीले जनाएको छ ।
गएराति भारी बर्षा भएकाले कमला खोलाको बहाव बढेको छ ।