जंगल बचाई देउ यो देशको बहुमुल्य खानी बचाईदेऊ ।
दिल म आफैं बचाउँछु लौन सरकार जवानी बचाईदेऊ ।

अब नयाँ सृजना गर्न सक्दैनौ संस्कृतिको थाहा भयो
यी डोका, डाला, हर्पे, ढुंग्रो, ठेकी मदानी बचाईदेऊ ।

बैँस अनि पैसा मै माथि लगानी गरेर सिध्याएँ जिन्दगी
बचाउने नै भए यी मेरा बाआमाको लगानी बचाईदेऊ ।

देशले सिमाना बचाउन सकेन आफ्नै देशका नेताबाट
बिन्ती मास्टर साप बच्चाहरुको आनिबानी बचाईदेऊ ।

कालरात्री जसोतसो बितायौँ अब कालो दिन नभोगौं
बाँकी छ समय सक्नेभए सुनौलो बिहानी बचाईदेऊ ।

मैयाँ लामिछाने

सिन्धुली