कात्तिक १४, सिन्धुली/नेपाल साफ महिला च्याम्पियनसिप फुटबलको फाइनल खेल आज हुँदै छ । आज साँझ ६:३० बजेबाट घरेलु टोली नेपाल र बंगलादेशबिच त्रिपुरेश्वरस्थित दशरथ रंगशालामा हुने फाइनल खेल कमलामाई नगरपालिका अगाडिको स्मार्टबोर्डबाट प्रत्यक्ष प्रसारण गरिने भएको हो ।

नेपालको समर्थनमा खेलप्रेमि दर्शकको अनुरोधलाई मध्यनजर गर्दै कमलामाई नगरपालिकाको सहयोगमा स्मार्ट बोर्डबाट फाइनल खेलको प्रत्यक्ष प्रसारण गरिने जनाइएको छ । कमलामाई नगरपालिकाका नगर प्रमुख उपेन्द्र पोख्रेलले खेलाडिहरुलाई थप हौसला थप्नको लागि साँझ नगरपालिका अगाडि उपस्थितीको लागि आग्रह समेत गर्नुभएको छ ।

घरेलु टोली नेपालले सेमिफाइनल खेलमा भारतलाई पेनाल्टी सुटआउटमा ४–२ ले पराजित गर्दै फाइनल पुगेको हो । निर्धारित समयमा दुवै टोलीको १/१ गोल भएको थियो । त्यस्तै सेमिफाइनल खेलमा बंगलादेशले भुटानलाई ७–१ गोलअन्तरले पराजित गर्दै फाइनलका लागि स्थान बनाएको थियो ।