असोज १४, सिन्धुली/सिन्धुलीमाढीमा जारी खुल्ला ब्याडमिन्टन प्रतियोगिता समापन भएको छ । ब्याडमिन्टन प्रतियोगिताको प्रथम स्थान ईश्वरलाल श्रेष्ठ र पूरण दियाली को जोडि भएका छन् ।

प्रथम बिजेताले २ वटा कालिज,शिल्ड, मेडल र प्रमाणपत्र पुरस्कार प्राप्त गरेका छन् । त्यस्तै दोस्रो बिजेता शंकर दियाली र फणीन्द्र फूयाल भएका छन् । दोस्रो बिजेतालाई दुई वटा लोकल कुखुरा, शिल्ड, मेडल र प्रमाणपत्र प्रदान गरिएको छ ।

साथै तेस्रो बिजेता नवराज थापा र प्रदिप कार्कीले लोकल हाँस ,शिल्ड, मेडल र प्रमाणपत्र प्राप्त गरेका हुन् । बिजेताहरुलाई भेटेरिनरी अस्पतालका प्रमुख डाक्टर प्रभात न्यौपानेले बितरण गर्नुभएको थियो ।

नजिकिदै गरेको विजयादशमी, दिपावली तथा छठपर्वको अवसरमा भेटेरिनरी ब्याडमिन्टन समुहद्धारा खुल्ला ब्याडमिन्टन प्रतियोगिताको आयोजना गरिएको सँस्थाका उपाध्यक्ष बिमल श्रेष्ठले बताउनु भयो । नेपालीहरुको माहान पर्व नजिकीदै गर्दा मनोरन्जन, शारिरिक तन्दुरुस्त साथै शुभकामना आदान प्रदानको लागि खुल्ला ब्याडमिन्टन प्रतियोगिताको आयोजना गरिएको भेटेरिनरी ब्याडमिन्टन समुहका अध्यक्ष शम्भु बहादुर श्रेष्ठले बताउनु भयो । प्रतियोगितामा ३२ जोडिले सहभागिता जनाएका थिए ।