सिन्धुली/सिद्धार्थ बैंक सिन्धुली शाखाले जिल्लाको अति दुर्गममा रहेको एक विद्यालयका विद्यार्थीहरुलाई शैक्षिक सामाग्री वितरण गरेको छ ।फिक्कल गाउँपालिका वडा नं ६ रत्नावती सोखुखोला स्थित श्री जनजागृती प्राविका ४७ जना बालबालिकाहरुलाई शैक्षिक सामाग्री उपलव्ध गराइएको हो ।

सँस्थागत सामाजिक उत्तरदायित्व कार्यक्रम अन्तर्गत सिद्धार्थ बैंक शाखा सिन्धुलीले उक्त शैक्षिक सामाग्री वितरण गरेको बैंकका सिन्धुली शाखा प्रमुख कुमार कार्कीले जानकारी दिनुभयो । बैंकले बिद्यार्थीहरुलाई विद्यालय पोशाक, न्यानो कपडा स्विटर, झोला र जुत्ता उपलव्ध गराएको छ ।

विद्यालय व्यवस्थापन समितिका अध्यक्ष राम बहादुर मगरको अध्यक्षता तथा फिक्कल गाउँपालिकाका पूर्व अध्यक्ष धन बहादुर कार्कीको प्रमुख आतिथ्यतामा भएको औपचारिक कार्यक्रमकाबीच विद्यार्थीहरुलाई शैक्षिक सामाग्री वितरण गरिएको हो । सिन्धुलीकै एकता साकोसका व्यवस्थापक दिपेन्द्रध्वज बस्नेत र रोट्र्याक्ट क्लव अफ सिन्धुलीगढीका सल्लाहकार सुदर्शन शाहीको सहजिकरणमा शैक्षिक सामाग्री उपलव्ध गराइएको बताइएको छ । सिद्धार्थ बैंकले १ लाख ३० हजार मूल्य बराबरको विद्यालय पोशाक र झोला उपलव्ध गराएको छ । त्यस्तै दिपेन्द्रध्वज बस्नेत र सुदर्शन शाहीले २३ हजार मूल्य बराबरको जुत्ता उपलव्ध गराएका छन् ।

सिद्धार्थ बैंक लिमिटेडका मधेश उपप्रादेशिक कार्यालयका प्रमुख सुर्य प्रसाद शर्मा उपाध्यायको उपस्थितिमा विद्यार्थीहरुलाई शैक्षिक सामाग्री वितरण गरिएको बैंकका सिन्धुली शाखा प्रमुख कुमार कार्कीले बताउनुभयो । फिक्कल गाउँपालिका वडा नं।६ रत्नावतीका विपन्न, दलित तथा जनजाति समुदायका बालबालिकाहरुलाई शैक्षिक सामाग्री सहयोग गरिएको हो । बालबालिकाहरुको शैक्षिक अवस्था सुधार गर्ने र विद्यालय पोशाकको अभावमा बालबालिकाहरुले विद्यालय छोड्न नपरोस् भन्ने हेतुले शैक्षिक सामाग्री उपलव्ध गराइएको बैंकले जनाएको छ । बैंक तथा वित्तिय सँस्थाहरुले हरेक वर्ष सामाजिक उत्तरदायित्व अन्तर्गत कार्यक्रम सन्चालन गर्नुपर्ने हुन्छ । तर सवै सँस्थाहरुले यो शिर्षकमा कार्यक्रम गरेको पाइँदैन ।

बैंक तथा वित्तिय संस्थाहरु नाफामा मात्र लक्षित हुन्छन्, समाजप्रति उत्तरदायि हुँदैनन् भन्ने आरोप लागिरहेका बेला सिद्धार्थ बैंक सिन्धुलीले भने उक्त आरोपलाई चिर्न प्रयत्न गरेको छ । त्यसो त जिल्लाका अन्य केहि वित्तिय सँस्थाले पनि सामाजिक उत्तरदायित्व अन्तर्गत कार्यक्रमहरु गरेका हुन्छन् । तर अधिकांस वित्तिय सँस्थाहरुले भने यसलाई अझै पनि नकारिरहेको देखिन्छ । सिद्धार्थ बैंकले विद्यार्थीहरुका लागि गरेको यस्तो सत्कर्म अरुले पनि सिक्न जरुरी देखिन्छ ।