सिन्धुली/जिल्ला ट्राफिक प्रहरी कार्यालय सिन्धुलीले आर्थिक वर्ष २०८१/८२ मा १ करोड १९ लाख ९९ हजार १७ रुपैयाँ राजस्व संकलन गरेको छ ।

यो रकम भनेको आर्थिक वर्ष २०८०/८१ को भन्दा ९३ लाख ९७ हजार सत्र रुपैयाँ कम हो । आर्थिक वर्ष २०८०/८१ मा कार्यालयले २ करोड ६ लाख २ हजार राजस्व संकलन गरेको थियो । कारबाहीमा परेका सवारीसंग प्रहरीले जरीवाना बापत नगद रकम लिने गरेको थियो । तर प्रविधीको विकाससंगै ट्राफिकले फोनपेबाट कारबाही बापतको रकम लिन सुरु गरेको छ । यसबाट राजस्व रकम अपेक्षा भन्दा कम संकलन भएको प्रहरीले बताएको छ ।

गत आर्थिक वर्षको १२ महिनामा १३ हजार १ सय ४७ सवारी कारवाहीमा पर्दा उक्त रकम संकलन गरिएको जिल्ला ट्राफिक प्रहरी कार्यालय सिन्धुलीका कार्यालय प्रमुख मोहम्मद कलिन अन्जुमले जानकारी दिनुभयो । वहाँका अनुसार सवैभन्दा बढि जीप, कार कारबाहीमा परेका छन् । जसबाट ४८ लाख ९४ हजार ५ सय १२ रुपैयाँ संकलन भएको छ । त्यस्तै ट्रक, बस, ट्रयाक्टर, मोटरसाइकल र अटोबाट बाँकी राजस्व संकलन भएको छ । सबैभन्दा कम राजस्व अटोबाट संकलन भएको छ ।

आर्थिक वर्ष २०८१/८२ को साउन महिनामा सवैभन्दा धेरै राजस्व संकलन भएको छ । साउन महिनामा १४ लाख ६६ हजार रुपैयाँ संकलन भएको कार्यालयको तथ्यांकमा उल्लेख छ । त्यस्तै सवैभन्दा कम राजस्व पुस महिनामा संकलन भएको छ । पुस महिनामा ६ लाख ६० हजार पाँच सय रुपैयाँ संकलन भएको छ ।

आर्थिक वर्ष २०८०/८१ सम्म नगद आम्दानी भएता पनि गत बर्षबाट इसेवा र इसेवा प्रयोग नगर्ने व्यक्तिले राष्ट्रिय बाणिज्य बैंकमा जम्मा गर्नुपर्ने नियम छ । कारवाहीमा परेका सवारीधनीले नियम उलङघन गर्दा पहिलो पटक ५०० रुपैयाँ, दोस्रो पटक १ हजार र तेस्रो पटक १ हजार ५ सय रुपैयाँ तिर्नुपर्ने नियम रहेको छ । नियम मिच्नेहरु अधिकांस सरकारी कर्मचारीहरु र भिआइपिहरु रहनेगरेको प्रहरीले जनाएको छ । नबुझेर नियम मिच्नेलाई भन्दा सवैकुरा जानकार भएर पनि जानीजानी हेपेर नियम मिच्नेहरुलाई सम्झाउन निकै गार्हो हुने ट्राफिक प्रहरीहरु बताउँछन् ।