सिन्धुली/स्वास्थ्यको लागि खेलकुद तथा राष्ट्रका लागि खेलकुद‘ भन्ने नाराका साथ फागुन ८ गते देखि सुरु भएको जिल्ला खेलकुद महोत्सव अन्तर्गत सोमबार पनि विभिन्न विधाका खेलहरु खेलाइएको छ ।

प्रतियोगितिा अन्तर्गत आज तीनवटा खेलहरु सम्पन्न भएका छन् । जसमा पुरुष तर्फ भएको भलिबलको फाइनलमा कमलामाई नगरपालिकाले पहिलो स्थान प्राप्त गरेको छ । तीनपाटन गाउँपालिकाले दोस्रो स्थान र सुनकोशीले तेस्रो स्थान प्राप्त गरेका छन् । तीनपाटन गाउँपालिकालाई पराजित गर्दै कमलामाईले उपाधि चुमेको हो । पुरुषतर्फको भलिवलमा सरोज हायु म्यान अफ दि म्याच भएका छन् ।

महिला तर्फको भलिवलको फाइनलमा कमलामाईलाई पराजित गर्दै तीनपाटन गाउपालिकाले पहिलो स्थान हासिल गर्न सफल भएको छ । त्यस्तै कमलामाई नगरपालिका दोस्रो स्थान हासिल गर्न सफल भएको छ भने सुनकोशी गाउँपालिका तेश्रो भएको छ । महिला तर्फ भएको फाइनल फुटबल प्रतियोगितामा मरिण गाउँपालिका र हरिहरपुरगढीबीच प्रतिष्पर्धा भएको थियो । जसमा मरिणलाई पराजित गर्दै हरिहरपुरगढीले उपाधि प्राप्त गरेको छ ।

आजै भएको ३००० मिटर दौड एथलेटिक्स महिला तर्फ कमलामाई नगरपालिकाले पहिलो स्थान हासिल गर्न सफल भएको छ भने दोस्रो स्थान मरिण गाउँपालिकाले प्राप्त गरेको छ । यस्तै पुरुष तर्फको एथलेटिक्स ३०० मिटर दौडमा कमलामाई नगरपालिका प्रथम, मरिण गाउँपालिका दोस्रो र सुनकोशी गाउँपालिका तेश्रो भएको छ ।

पुरुष तर्फको फुटबलमा कमलामाई नगरपालिका र हरिहरपुरगढी गाउँपालिका बिच फाइनल खेल भोली (मंगलबार) हुने आयोजकले जनाएको छ । कराँते, भलिवल, फुटवल, एथलेटिक्स, क्रिकेट लगायतका खेलहरु समावेश गरिएको खेलकुद महोत्सवमा जिल्लाका नौ वटै स्थानीय तहबाट प्रतिष्पर्धीहरु सहभागि भएका छन् । जिल्लामा पहिलोपटक खेलकुद महोत्सवको आयोजना गरिएको हो । महोत्सवको समापन फाल्गुण १३ गते मंगलबार हुनेछ ।